Verðlaun

Markaðsstofa höfuðborgarsvæðisins veitir árlega tvenn verðlaun í ferðaþjónustu: Höfuðkraftur og Höfuðvinur.

Höfuðkraftur 

Höfuðkraftur er veittur þeim sem hefur með starfi sínu og stefnu eflt ferðaþjónustuna á höfuðborgarsvæðinu og stuðlað að jákvæðum áhrifum á nærumhverfi sitt og samfélag. Tilgangurinn með verðlaununum er að vekja athygli á mikilvægi ferðaþjónustu sem atvinnugreinar og gildi hennar fyrir jákvæða þróun samfélags og mannlífs á höfuðborgarsvæðinu.

Það skiptir máli að hampa því sem vel er gert og með verðlaununum Höfuðkrafti heiðrar Markaðsstofa höfuðborgarsvæðisins ferðaþjónustuaðila og stofnanir á höfuðborgarsvæðinu fyrir árangursríkt starf. Tilnefnt er til verðlaunanna af hálfu aðildarfélaga Markaðsstofu höfuðborgarsvæðisins, fyrirtækja og stofnana sem starfa í ferðaþjónustu. Vinningshafinn fær afhentan Höfuðkraftinn á Ferðamálaþingi höfuðborgarsvæðisins sem haldið er af Markaðsstofu höfuðborgarsvæðisins.

Ferðaþjónustuverðlaunin Höfuðkraftur voru veitt í fyrsta skipti á Ferðamálaþingi höfuðborgarsvæðisins 2025 og verða veitt árlega í framhaldinu.

Höfuðvinur

Markaðsstofa höfuðborgarsvæðisins verðlaunar áhuga og elju aðildarfélaga sinna með viðurkenningunni Höfuðvin. Viðurkenningin var fyrst veitt á Höfuðgleði 2024 og ári síðar á Ferðamálaþingi höfuðborgarsvæðisins. Hún byggist á því hve oft viðkomandi starfsmaður hjá aðildarfélaga stofunnar hefur mætt á viðburði Markaðsstofunnar og tekið þátt í starfi á vegum hennar. 

Höfuðvinur 2026

Á Ferðamálaþingi höfuðborgarsvæðisins hlaut Sævar Helgi Bragason, Stjörnu-Sævar, viðurkenninguna Höfuðvinur 2026 fyrir einstaka elju, úthald og dugnað í að vekja athygli á þeim áskorunum og tækifærum sem fylgdu almyrkvanum 12. ágúst 2026. Löngu áður en flestir höfðu áttað sig á umfangi viðburðarins vakti Sævar Helgi fyrirtæki, sveitarfélög og stofnanir til vitundar um að mikilvægt væri að búa sig undir eina mestu áskorun íslenskrar ferðþjónustu á seinni árum.

Höfuðvinur 2025

Lára Aradóttir, sölustjóri hjá Sky Lagoon, hlaut verðalaunin Höfuðvinur Markaðsstofu höfuðborgarsvæðisins 2025. Lára hefur stutt dyggilega við bakið á starfi Markaðsstofunnar og sýnt eflingu áfangastaðarins og ferðaþjónustu á höfuðborgarsvæðinu einstakan áhuga.

Höfuðvinur 2024

Í fyrsta skiptið sem verðlaunin Höfuðvinur voru veitt var það Valgeir Bjarnason frá BagBee sem hlaut verðlaunin. Hann mætti á flesta tengslaviðburði á vegum Markaðsstofunnar og hefur verið sérstaklega vinveittur henni í öllu samstarfi.